...І калі сышоў сусьветны дым, У якім наш божы край загінуў, Пад крыжом драўляным і старым Сын на могілках знайшоў Айчыну. І была Айчына той травой, Што ўзяла жыцьцё ад праху маці, Што свой век жыла адна-адной У старой, як сьвет грахоўны, хаце. Ці ўздымаўся крыж да аблачын, Ці аблокі нізка праплывалі, Ды адчуў сябе вялікім Сын У траве, што ворагі тапталі. І ўскіпела, як агонь, трава І крыжы старыя асьвяціла, І ўзьляцела з могілак сава, І раскрылася прад ім магіла, Як Сусьвету чорнае вакно, Празь якое Сын былое ўбачыў, Дзе ён піў, як кроў бацькоў, віно І, як прыхадзень, штодня сьвінячыў. І калі сышоў былога дым І ў нябыт магільны холад згінуў, Пад крыжом драўляным і старым Сын абняў, нібы свой крыж, Айчыну...
4.X.1998.
|
|